«Регион» каналынын жетекчиси Өткүрбек Рахманов социалдык тармактагы баракчасына мурдагы депутат Султанбай Айжигитовдун соттогу видеосун жарыялады.
«Султанбай Айжигитовду да, анын жубайын да УКМК кызматкерлери сабаган эмес жана алар аны сабашы мүмкүн да эмес болчу. Бул тууралуу Айжигитов өзү да ачык эле интервьюларында айтып жатат. Колунда көк ала кармоо учурунда ыкчам кызматкерлерге баш ийбей каршылык көрсөтүп, унаага олтурбай жулкулдашып атканда пайда болгонун айтты. Ал эми кашын кантип, кандай ыкма менен жарып, анан сүрөткө тартып чыгарганы бул видеодон көрүнүп турат. Бөгөт чарасы каралганы келген сот залында Айжигитов өзү негедир столду сүзүп көргөн жана андан соң аны ооруканага алып барышкан»,- деп жазды ал.
Буга чейин социалдык тармактарда Султанбай Айжигитовдун денеси көгала болгон сүрөттөр тараган. Айжигитов кармоо учурунда жаракат алып, ооруканага түшкөнүн айткан.
“Адвокатымдын үйүнүн алдынан УКМКнын кызматкерлери чыгышты. Жактоочумду алып алып суракка баралы деп сүйлөшүп турганда эле алар аялымды машинеге салабыз деп сүйрөп башташты. Ага болушуп, ажыратайын дегенде мени да кармап баштады. Колу-бутубузду кайрып атып жаракат алдык”, — деген ал.
