Кечээ, 30-сентябрда SEREPTV телеканалынын ютубдагы баракчасына Боом капчыгайында сөөгү табылган 17 жаштагы Айсулуунун агасымын деген Сыймык Нарынбек уулу аттуу жарандын видеомаеги жарык көргөн. Нарынбек уулу өз сөзүндө маркумдун агасы болорун, бирок бир тууганы эмес экенин айткан.

Бүгүн ИИМ «видеодогу жаран маркумдун тууганы эмес, ал коомчулукту адаштырган” деген маалымат таратты.

Сыймык Нарынбек уулунун байланыш номерин WhatsApp мессенжериндеги Бишкек шаардык Ички Иштер Башкармалыгынын “Пресс-Центр УПСМ по ГУВД г.Бишкек” деп аталган группага Милициянын Кайгуул милиция башкармалыгынын маалымат катчысы Надырбек Жусупов салган. Экранда Жусуповдун “Резонанс жасоо керек. Бул маркумдун агасынын номери. Маалымат керек болсо байланышкыла” деп жазганын көрүп жатасыздар. Биздин редакция дал ушул ишенимдүү булактын берген маалыматынын негизинде Нарынбек уулуна байланышып, маектешкен.

Сыймык Нарынбек уулунун интервьюсун SEREPTV’дан тышкары, Би-Би-Си кыргыз кызматы жана SUPER.KG порталы тартып, жарыялаган. Учурда маркумдун агасымын деген Сыймык Нарынбек уулу Айсулуунун үй-бүлөсүнө кандайча тиешеси бар, такталууда. Алдыда кененирээк маалымат беребиз.

Кийинки видеодо маркумдун жакындарынын Сыймык Нарынбек уулу тууралуу тастыктоосун көрө аласыз.