Бүгүн, 17-июнда Мамлекеттик салык кызматынын төрагасы Алмамбет Шыкмаматов Кыргызстандын креативдүү экономикасынын алдыңкы өкүлдөрү менен жолугушуу өткөрүүдө.

Жолугушуунун жүрүшүндө президенттин креативдүү индустриялардын өкүлдөрүнө, IT-секторго жана санариптик контент жаратуучуларга олуттуу салыктык жеңилдиктерди караган №207 «Салык салуу жана салыктык башкаруу системасын өркүндөтүү боюнча чаралар жөнүндө» Жарлыгынын концепциясы талкууланууда. Алмамбет Шыкмаматов документтин максаттары жана милдеттери тууралуу кеңири маалымат берип, аны ишке ашыруунун негизги механизмдерин түшүндүрдү. Жолугушуунун катышуучулары салыктык башкаруунун жаңы чараларынын креативдүү экономиканы, санариптик технологияларды жана өлкөдөгү ишкердик чөйрөнү өнүктүрүүгө тийгизе турган таасирин талкуулашты.

Жарлыкта каралган жеңилдиктерди натыйжалуу колдонуу жана мамлекеттик колдоо чаралары бизнести, чыгармачыл индустрияларды жана санариптик контент өндүрүшүн өнүктүрүүгө өбөлгө түзө турган шарттарды түзүү маселелерине өзгөчө көңүл бурулду. Ачык диалог форматында өткөн жолугушууда тармак өкүлдөрү Салык кызматынын төрагасына кызыктырган суроолорун берип, ошондой эле Кыргыз Республикасындагы салык саясатын мындан ары өркүндөтүү жана бизнес-климатты жакшыртуу боюнча сунуштарын киргизүүгө мүмкүнчүлүк алышты. Салык кызматынын төрагасы жаңы механизмдер экономикалык активдүүлүктү жогорулатууга, ишкердикти колдоого жана экономиканын заманбап тармактарын өнүктүрүү үчүн жагымдуу шарттарды түзүүгө багытталганын белгиледи.

Өзүнчө блок катары мамлекеттик колдоонун жаңы чараларын практикалык колдонуу жана алардын дизайнерлерге, IT-иштеп чыгуучуларга, блогерлерге, режиссёрлорго, продюсерлерге жана креативдүү индустриянын башка өкүлдөрүнө тийгизе турган реалдуу таасири талкууланды. Катышуучулар Жарлыкта каралган механизмдердин иш жүзүндө кандай иштей турганын жана алар тармактын өнүгүшү үчүн кандай жаңы мүмкүнчүлүктөрдү ача турганын кеңири карап жатышат.