Тажикстандын кол салуусунан каза болгон чек арачынын кош бойлуу жубайы жана эки баласы аскер бөлүктө күн кечирип жатканы маалымдалды. Бул тууралуу соцтармактын колдонуучусу жарыялады.
«16-17-сентябь күнү кыргыз-тажик чек арасындагы куралдуу кагылышууда курман болгон Мирлан Ниязовдун артында кош бойлуу жубайы жана эки чүрпөсү калган. Азыр маркумдун үй-бүлөсү 2022 аскер бөлүгүндө күн кечирип жатыптыр. Анткени алардын бара турган башка жери жок.
Жубайы Сатина Лайлиеванын айтымында, Баткендеги акыркы чек ара жаңжалында курман болгон аскер адамдарынын үй-бүлөсүнө мамлекет турак-жай берген. Бирок аларга эмне үчүн берилбей калганы түшүнүксүз. Жубайы маркум жолдошу менен нике күбөлүгү жана балдарынын туулгандыгы жөнүндө күбөлүктөрү бар экенин айткан. Бериле турган үйдү кайненеси алышы мүмкүндүгүн кошумчалаган», — деп жазылат билдирүүдө.
СЕРЕП МЕДИА маалымат агенттиги Чек ара кызматынын басма сөз кызматына жогорудагы окуя боюнча кайрылган учурда маркум чек арачыга үй берилгенин жана аталган мекеме маркумдун үй-бүлөлүк маселелерине кийлигише албай тургандыгын билдиришти.
