Таштандыдан табылган ымыркай чарчап калды. Бул маалыматты Саламаттыкты сактоо министрлигинен тастыкташты.
Маалыматка ылайык, ымыркайдын абалы оор эле. Ал ооруканада кечээ, 1-февралда көз жумду.
Ымыркайды 28-январь күнү Бишкекте көчөлөрдүн биринде таштандыдан окуучу балдар таап алган. Алар SEREPTV телеканалына маек беришип, окуя тууралуу айтып беришкен. Анда өспүрүмдөр таштандыдан ымыркайдын үнүн угуп, алгач өздөрү баштыкты ачып көрүшүп кайра коркуп таштап коюшканын, анан колу жетпей, селсаяктардан жардам сурап баштыкты алып ачышканын айтышкан.
Окуучу балдар Турдубек Кошбаев менен Байыш Алтынбаев оозуна марля тыгылган, киндиги кесиле элек баланы таштандынын тегерегиндеги кийимдерди таап келип ороп, ысык күлгө коюп, тез жардам менен милиция чакырышканын айтып, бөбөктүн тирүү экендигин кошумчалашкан болчу. Өспүрүм балдардын биринин апасы ымыркай кызды багып алууга даяр экендигин да айткан.
Саламаттыкты сактоо министрлиги ымыркай тууралуу «28-январь күнү саат 08:05те тез жардам менен Шаардык балдардын клиникалык тез жардам ооруканасына оор абалдагы ымыркай жеткирилген. Ага ара төрөлгөн деген диагноз коюлган кыздын абалы туруктуу оор деп бааланууда. Бөбөк тиешелүү дарылоонуудан өтүп жатат» деп маалымат берген.
