Чүй облустук милициясы Токмоктогу №12 мектепте болгон окуучулардын мушташы боюнча маалымат берди.
Маалыматка караганда, 3-апрелде Токмок ШИИБге 1975-жылы туулган жаран кайрылып, анын 2008-жылы туулган уулун сабаган башка мектептин 10-11-класстарынын окуучуларына чара көрүүнү суранган. Аталган факты каттоого алынып, териштирүү башталган.
«Саат 11:30 чамасында Токмоктогу №1 мектептин 10-классынын окуучулары И.А., К.Р., А.А. жана 2008-жылы туулган Ю.М. Токмоктогу №12 мектепке сынакка барышкан. Ал жерде жаш автоинспектор сынагы өтүп жаткан. К.Р. аттуу окуучу менен сынак өтүп жаткан мектептин окуучусу уруша кетип, эки мектеп окуучулары арасында мушташ башталган. Кесепетинен И.А. денесиндеги жаракаттары менен ооруканага түшкөн. Учурда Токмок шаарындагы №12 мектептин мушташка катышкан окуучуларынын өздүгү жана жашаган жери такталып жатат»,- деп айтылат маалыматта.
