Ысык-Көл облусунун Тоң районунда токойлорду калыбына келтирүү жана аймактын экологиялык абалын жакшыртуу максатында бир катар иш-чара өткөрүлдү. Бул тууралуу Токой кызматынан билдиришти.
Иш-чаранын алкагында Тон токой чарбасынын Кара-Кемер участогунда 30 гектар аянтка көчөт отургузулуп, ал эми Бөкөнбаев айылында ФАОнун колдоосу менен курулган заманбап күнөскана жана көчөт сактоочу муздаткыч кампасынын расмий ачылышы болуп өттү.
ФАОнун «Френс» долбоорунун алкагында курулган 500 чарчы метр аянттагы күнөскана жана көчөт сактоочу муздаткыч кампасы токой чарбасынын өндүрүштүк мүмкүнчүлүктөрүн кеңейтип, сапаттуу көчөттөрдү жыл бою өстүрүүгө жана сактоого шарт түзөт. Бул объектилердин ишке берилиши аймактагы жашылдандыруу иштерин системалуу негизде жүргүзүүгө мүмкүндүк берет.
Дагы Тоң токой чарбасынын административдик имараты толугу менен капиталдык оңдоп-түзөөдөн өткөрүлүп, заманбап шарттар менен камсыздалды.
Иш-чарага Өзгөчө кырдаалдар министринин биринчи орун басары Азамат Мамбетов, Токой кызматынын жетекчилери, Ысык-Көл облусунун жергиликтүү бийлик өкүлдөрү жана ФАОнун өкүлдөрү катышты.
Ошондой эле «Жашыл мурас» программасынын алкагында Тоң токой чарбасына караштуу Кара-Кемер участогунда 30 гектар аянтка ийне жалбырактуу көчөттөр, анын ичинде Тянь-Шань карагайынын балатылары отургузулду. Аймак ФАОнун колдоосу менен толугу менен тосмолонуп, мал-жандыктардан корголгон.
