Акыйкатчы Ысык-Ата районунда 4 жашар наристе кыздын зордукталышын өтө өкүнүү менен кабыл алып, мамлекеттик органдарды балдардын социалдык абалына көз салууну күчөтүүгө чакырды.
Ысык-Ата районундук эмгек, социалдык камсыздоо жана миграция башкармалыгынын үй-бүлөнү жана балдарды коргоо бөлүмүнүн маалыматында, ушул жылдын 18-августунда 4 жашар наристе жакын тууганы тарабынан зордукталганы айтылат. Маалыматка ылайык, кыздын ата-энеси ажырашып кеткендиктен, аял балдарын Ысык-Атадагы туугандарына таштап, Бишкекке иштегени кеткен. Кызга зомбулук көрсөткөн өспүрүм TikTok социалдык баракчасынан көргөнүн туурап, 4 жашар кызга сексуалдык зомбулук көрсөткөнүн айткан.
Наристе Ысык-Ата райондук ооруканасынан кароодон өтүп, ага зомбулук болгону аныкталган. Кыздын апасы окуя тууралуу уккандан кийин микроинсульт алып, Ысык-Ата райондук ооруканага жаткырылган, кийинчерээк шаарга которулганы маалым болду. Наристенин апасы милицияга арыз жазуудан баш тарткан. Ошого байланыштуу, Ысык-Ата районунун үй-бүлөнү жана баланы коргоо бөлүмүнүн кызматкерлери мыйзамдуу өкүлү катары дайындалган. Ысык-Ата милициясы Кылмыш-жаза кодексинин 154-беренесинин (зордуктоо) менен иш козгоп, наристеге зомбулук көрсөткөн өспүрүмдү 18-август күнү кармаган.
Учурда Ысык-Ата райондук эмгек, социалдык камсыздоо жана миграция башкармалыгы баланы коргоо боюнча жекече планынын негизинде иш алып барууда. Кызга узак мөөнөттүү реабилитация талап кылынат.
Акыйкатчы балдар менен иш алып барган мамлекеттик органдарды профилактикалык иш-аракеттерди күчөтүүгө чакырып, ата-энелерди балдардын уюлдук телефондо эмне көрүп, кандай убакыт өткөрүп жатканына көңүл бурууга үндөдү.
