«Равшан тентек» каймана аттуу жаран кармалганын УКМКдан билдиришти.
УКМК Кылмыш-жаза кодексинин 222-беренеси «Кылмыштуу кирешелерди легализациялоо» боюнча кылмышка шектүү катары “Женго” каймана аттуу Кадыр Досоновдун уюшкан кылмыштуу тобуна тиешеси бар, 1967-жылы туулган «Равшан-Тентек» каймана аты менен белгилүү Кыргызстандын жаранын Баткен шаарында кармады.
Аталган жаран 2001-жылы Дара айыл өкмөтүнүн «Жетиген» техникалык сервисинин балансында турган Көк-Дөбө дачасын өзүнө чектеш аймагын 1,5 га өлчөмүндө мыйзамсыз ээлеп алган, кийин документтерди Баткен шаардык башкармалыгы аркылуу мыйзамдаштырган.
Андан соң, ал аталган аймакта чарбалык курулуштары бар турак үй курган. 2004-жылы кылмыштуу кирешелерин жашыруу максатында мүлктү жакын тууганына каттаткан.
Ошондой эле ал өзүнүн кылмыш чөйрөсүндөгү абалынан пайдаланып, Баткен районунун аймагындагы бир нече жер тилкелерин жана кыймылсыз мүлк объекттерин мыйзамсыз ээлеп алып, жакын туугандарынын атына каттатып алган.
«Баткен районунун Бужум айылындагы 15 гектар айыл чарба жер тилкесин мыйзамсыз пайдаланып эгиндерин сугаруу максатында төмөндө жайгашкан калктуу конуштардын тургундарын ичүүчү суу менен камсыз кылуучу «Таза-Суу» скважинасына өзүм билемдик менен кошулган. Натыйжада, аталган конуштун тургундарында ичүүчү суунун жетишсиздиги көйгөйү жаралган.
Мындан тышкары, ага карата Кылмыш-жаза кодексинин 215-беренеси менен электр энергиясын өз алдынча пайдалануу фактысы боюнча кылмыш иши козголгон. Тактап айтканда, ал 2001-2025-жылдары электр тармактарына эсепке алуучу шайманы жок мыйзамсыз кошулуп, натыйжада мамлекетке 1 миллион 200 миң сомдон ашуун зыян келтирген»,— деп айтылат маалыматта.
