Акыйкатчы Жамиля Жаманбаева мамлекеттик органдарды мектеп окуучуларынын коопсуздугун камсыздоого чакырды.
Акыйкатчы институтуна 38 жаштагы Ош облусунун тургуну кайрылып, 2012-жылы туулган уулунун укугун коргоп берүүнү өтүнгөн. Уулу Ломоносов атындагы мектептин 7-классынын окуучусу. Анын айтымында уулу 2024-жылдын сентябрь айынын тарта 8-класстын 2 окуучусу тарабынан коркутууларга кабыл болгон. Өспүрүмдөр баланы бычак жана кастет менен коркутуп, мектептин жер төлөсүнө чакырып алып, акча талап кылып келишкен. Бала окууга жана спортко болгон кызыгуусун жоготуп, футболго да баргысы келбей калган.
“Менин уулумду жада калса сабак учурунда да чакырып, тамак-аш алып берүүгө мажбурлашкан. Мен баламдын телефонуна “Ата-энин көзөмөлүн” орноткондон кийин жазышканын окуп, уулумдан коркутуп акча алып жатышканын түшүндүм. Балам акчаны электрондук капчыгына которуп жана накталай да берип жүрүптүр”, — деди аял.
Аял мектеп администрациясына кайрылганы менен эч кандай чара көрүлбөй, уулунун коопсуздугу камсыздалган эмес. Укук коргоо органдары аялдан арыз кабыл алганы менен жашы жете электер менен иштөөчү инспекция да эч кандай иш алып барган эмес.
Жамиля Жаманбаева Агартуу министрлигине жана ИИМге бул окуя боюнча укуктук баа берүүгө, мектеп жетекчилигинин, жашы жете электер менен иш алып барган инспекциянын жоопкерчиликсиз мамилесине баа берүү өтүнүчү менен расмий кат жолдогон. Министрлик мектеп директоруна сөгүш жарыяланганын билдирди. ИИМ текшерүү жүргүзүп, мектептеги рэкетчилик фактылары ырасталганын маалымдады.
Жашы жете элек өспүрүмдөр акча талап кылышканын моюнуна алышкан. Бирок жаш курагына байланыштуу кылмыш иши козголгон эмес. Өспүрүмдөр жашы жете электер менен иш алып барган инспекциянын каттоосуна алынып, алардын ата-энелерине «Укук бузуулар жөнүндө» кодексинин 102-беренесинин 1-бөлүгүнө ылайык 1000 сом өлчөмүндө айып пул салынган. Жабыркаган баланын апасы кылмыш ишин козгоодон баш тартуу чечимин кайра кароону суранып, шаардык сотко арыз берген.
Тергөө судьясы анын арызын жарым-жартылай канааттандырып, Ош ШИИБинин Сулайман-Тоо РИИБинин тергөөчүсүнүн мектеп рэкетине кылмыш ишин козгоодон баш тартуу чечимин негизсиз деп таап, аны аныкталган мыйзам бузууларды жоюуга милдеттендирген. Бирок кийин балдардын ата-энелери элдешүү келишимине келип, арызын артка чакырып алышкан.
Акыйкатчы Институтунун 2024-жылдагы докладына ылайык, балдардын укуктарынын бузулушуна байланыштуу, анын ичинде зомбулук жана буллинг фактылары боюнча 54 кайрылуу катталган.
