Социалдык тармактын колдонуучусу 40 жаштагы таксист өспүрүм кызына ыдык көрсөткөнүн жазып чыкты.
Маалыматка караганда, окуя 29-сентябрда саат 19:40 чамасында болгон. «Менин кызым Чок-Тал айылында окуйт. Биз Караколдо жашайбыз. Мага окуу тарбия иштери боюнча тарбиячы чалып, кызымдын ооруп калганын, өзүн жаман сезип жатканын айтып алып кетүүмдү суранган. Жолдошум бош эмес болгондуктан таксист болуп иштеген агама чалып, такси таап берүүнү сурандым. Таап берген таксист менен байланышып, кызымды лицейден алып кетти. Унаага дагы эки жүргүнчү алып, жолго чыгышыптыр. Саат 19:30да кызым чалып, шаарга киришкенин айтты. Таксист эки жүргүнчүнү түшүрүп, кызымды үйгө жеткирейин дептир. Ал кызымдын рюкзагын ачып, ичинен тамеки көргөнүн айтып, «кат, апаң көрүп калат» дептир. Ал тамеги чегерин да сураптыр. Кызым кээде колдонорун айтыптыр. «Тамеки чексең ичсең да керек» дептир. Андан соң буттарын кармалап, кызсыңбы деп сураптыр. Кызым коркуп кетип ыйлап баштаганда мурду канаптыр. Таксист коркуп кетип, кечирим сурап, шайтан азгырганын айтыптыр. «Эгер мамаңа айтсаң мен тамеки чегериңди айтам» деп коркутуптур. Саат 19:40та үйгө келди. Көзү жашылданган. Эмне болгонун сурасам жооп берген жок. Таксист актанып баштады. Кечки тамак ичип жатканда да ыйлады. Сурасам эч нерсе болгон жок деп койду. Мен ооруп жатканы үчүн көңүлү жок го деп ойлодум. Саат 23:30 чамасында мага келип, баарын айтып берди. Ал нес абалында эркекке окшоштурушсун деп чачын кыркып салыптыр», — деди ал.
Аял таксист жазасыз калат деп коркуп жатканын кошумчалаган. «Урматтуу айымдар, кыз-келиндер, куугунтук жана зордук-зомбулук тууралуу коркпой, ачык айткыла. Кээ бир акмактар өзүн кармай албаганына сен күнөөлүү эмессиң. Ата-энелер, балдарыңыз менен сүйлөшүңүз, аларды ачык айтууга үйрөтүңүз, алардын колдоочусу болуңуз, ошондо бир нерсе болуп калса, алар сизге биринчи болуп айтышат», — деп жазды ал.
Окуя боюнча Ысык-Кол ОИИБ маалымат берди. «30-сентябрда Каракол шаардык ички иштер бөлүмүнө 1987-жылы туулган жаран арыз менен кайрылган. Арызда 29-сентябрда саат 16:40 чамасында 2009-жылы туулган кызы Ысык-Көл районунун Чок-Тал айылынан Каракол шаарына такси аркылуу келе жаткан учурда, айдоочу тарабынан адепке жат жана ыплас мүнөздөгү суроолор берилип, тийишүү аракеттери болгонун көрсөткөн. Бул факты Каракол ШИИБге катталып, учурда тергөөгө чейинки текшерүү жана ыкчам-иликтөө иш-чаралары жүргүзүлүүдө», — дешти.
