СМА генетикалык диагнозу менен төрөлүп, Кыргызстанда биринчи болуп Золгенсма уколун алган Аруузат эсиңиздерде болсо керек. SEREPTV телеканалы Аруузаттын ата-энеси менен маектешип, аталган уколдун Аруузатка тийгизген таасирин сурап, кыздын азыркы абалынан кабар алды.
«Аруузат 2022-жылы Золгенсма уколун алганда 3,5 жашта болчу. Укол алгандан кийин эле кызыбыз өзүн жакшы сезип, жакшы жыйынтык көрсөтүп баштаган болчу. Тилекке каршы 1 айдан кийин эле Аруузат аябай катуу ооруп калды. Вирус жуктуруп, пневмонияга чейин өтүшүп кетти. Ошондо 10 күндөй ооруканага жаткан. Өзү дем ала албай, дем алдыруучу аппараттын жардамы менен дем алып калган. Золгенсма алгандан кийин алсырап, иммунитети түшүп кетет экен. Ага карабастан кызыбыз жакшы жыйынтык көрсөтүп жатты. Азыркыга чейин калыбына келтирүү иштери жүрүп жатат. 2,5 жылдай болуп калды», — деди апасы.
«Акча чогултуу 2022-жылдын март айында жабылган. Кандайдыр бир тоскоолдуктар болуп, биз уколду август айында алдык. Ал учурда кызым 3,5 жашка чыгып калган. Салмагы 12-12,5 килограмм болчу. 12,5 килограммга чейин уколду сайыш керек дешкен. Биз акча чогултуп баштаганда эле ошол эле компаниянын илимий өкүлдөрү «салмагы 12 килограммдан ашса деле, 2 жаштан кийин деле алса болот» дешкен. Баары СМАнын тибинен көз каранды экен. Золгенсма уколун 21 килограмм салмакка чейин ала берсе болот. Баланын азыркы акыбалынан көз каранды. «Золгенсма уколу Аруузатка жардам берген жок» деген сөздүн өзү жалган маалымат. Аруузатка бул укол жардам берген. Рисдиплам бул укол эмес, суюк дары. Аны ичүүгө туура келет. Укол ала электе бир киши Рисдиплам ичип турсун деп акча берип, ичкен. Мамлекет тарабынан берилген эмес», — деди атасы.
