Өткөн жылдын январь айында Ошто дайынсыз болуп жаткан 4-курстун студентинин жансыз денеси табылган. Ал киши колдуу болгон.
Ош шаарына караштуу Кеңеш айылынын тургуну арыз менен кайрылып, анын 2000-жылы туулган кызы 30-январь күнү үйдөн окууга кеткен бойдон дайынсыз болуп жатканын билдирген. 8-февралда Ноокат районунун 1998-жылы туулган тургуну — ОшМУнун 4-курсунун студенти качып жүргөн жеринен кармалып, Ош ШИИБдин Тергөө кызматына жеткирилген.
- “30-январда саат 10:00 чамасында сүйлөшүп жүргөн кызым менен жолугуп, аны менен өзүм жашаган үйгө келдик. Анан ошол жерде экөөбүз сүйлөшүп отуруп, чырдашып, урушуп кеттик. Ошондо менин ачуум келип, аны үйдөгү аш бычак менен сайгылап өлтүрүп салдым. Андан соң анын өлүгүн үйдүн жанына көмүп, кышкы кийимдерин, сумкасын сыртта жайгашкан дааратканага ыргытып жибердим. Ошол күнү окууга бардым да, эртеси күнү Өзбекстандын аймагына өтүп, ошол жактан Орусияга учуп кеттим”, — деген шектүү.
Кара-Суу райондук соту июль айында шектүүгө карата чечим чыгарып, ал 15 жылга эркинен ажыратылган. СЕРЕП МЕДИА маалымат агенттигине Ош облустук сотунан 30-сентябрда билдиргендей, Ош шаардык сотунда иш аппеляциялык арыздын негизинде кайра каралган. Ош шаардык сотунун чечими менен шектүү Жазык кодексинин 112-беренеси (кош бойлуу аялды өлтүрүү) менен күнөөлүү деп табылып, өмүр бою эркинен ажыратылган.
Бүгүн, 24-январда СЕРЕП МЕДИА маалымат агенттигине кылмыш иши Жогорку Сотко жеткени маалым болду. Маалыматты Жогорку Соттон тастыкташты. Маалыматка караганда, биринчи соттук отурум жактоочусу ооруп калганына байланыштуу кийинкиге жылдырылган.
