Өзүн “Садыр Жапаровдун жээнимин, кеңешчисимин” деп тааныштырып, баасы 50 миллион сомго жакын көмүр кенин чет элдик компаниянын менчигине өткөрүп берүүнү талап кылган адам кармалды. Бул тууралуу УКМКдан билдиришти.
Шектүү кенди өткөрүп бербесе, укук коргоо органдарындагы байланыштары менен аны камата тургандыгын айткан. Бул боюнча УКМКга арыз түшүп, эки киши кармалды.
Бул факты боюнча кылмыш иши козголуп, иликтөөнүн жүрүшүндө Садыр Жапаров жана анын жакындары менен эч кандай мамилеси болгон эместиги такталган. Шектүүлөр тергөө абагына камалды. Учурда мыйзамсыз иш-аракеттердин бардык катышуучуларын, ошондой эле кармалган адамдар тарабынан жасалган кылмыштын башка фактыларын аныктоого багытталган тергөө иш-чаралары уланууда.
