Кримтөбөл Рыспек Акматбаевди мыкаачылык менен өлтүргөн кылмыштын бети ачылды. Бул тууралуу УКМКдан билдиришти.
УКМК тарабынан уюшкан кылмыштуу топторго каршы күрөшүү, ошондой эле кылмыштуу чөйрөнүн таасирин бөлүү максатында жасалган буйрутма киши өлтүрүүлөрдүн сериясына тиешеси бар адамдарды аныктоо боюнча жүргүзүлгөн ыкчам-издөө иш-чараларынын жүрүшүндө, көп жыл мурун болгон криминалдык авторитет Рыспек Акматбаевдин өлүмү ачылды.
2006-жылдын 10-майында Көк-Жар айылында мечиттин жанынан Ауди-100 үлгүсүндөгү унаа менен белгисиз адамдар Акматбаевге куралдуу кол салышкан, ал башына жана көкүрөгүнө көптөгөн ок тийип алган жаракатынан улам ошол жерден каза болгон. Ошол учурда укук коргоо органдарынын айтымына ылайык, киши өлтүрүүнү бир кылмышкер жасаган, ал беткап кийип Акматбаевди “Калашников” автоматынан атып, андан соң унаага түшүп, Бишкек шаары багытын көздөй из жашырып кеткен. Бул фактынын негизинде Кылмыш-жаза кодексинин 97-беренеси “киши өлтүрүү” (1997-ж. редакциясы) боюнча кылмыш иши козголгон, ал белгисиз себептер менен ушул убакка чейин резонанстуу кылмыш болуп ачылбай келген.
УКМК тарабынан жүргүзүлгөн комплекстүү ыкчам иш-чаралардын жүрүшүндө Акматбаевди өлтүрүүнү маркум Камчы Көлбаев, Алмамбет Анапияев, Б.Самсалиев (“Боха Казарманский”) жана М.Раимбеков (“Рэмбо” аты менен белгилүү, дайынсыз жоголгон) уюштуруп, жасагандыгы аныкталды.
Акматбаевди жок кылууну жогоруда аталган катышуучулардын баары аткарышы керек болгон, бирок адам өлтүрүү учурунда унаанын рулунда Раимбеков, ошондой эле унаанын артында отуруп кылмышты көзөмөлдөгөн Камчы Көлбаев калган. Буга байланыштуу Анапияев менен Самсалиев Көлбаевдин чыгышын күтпөстөн, Акматбаевди маңдайынан түз атып, андан соң белгисиз тарапка изин жашырып кетишкен. Бул фактылар Көлбаевдин киши өлтүргүчүнүн (киллер) көрсөтмөлөрүнүн негизинде аныкталды, анын аты-жөнү тергөөнүн кызыкчылыгы үчүн айтылбайт.
