Улуттук коопсуздук боюнча мамлекеттик комитеттин төрагасы Камчыбек Ташиев бүгүн, 24-декабрда маалымат жыйын берди.
Анда ал Бажы кызматынын төрагасынын мурдагы орун басары Райымбек Матраимов мамлекетке кайтарам деген 2 миллиард сомду толугу менен төккөнүн айтты. Анын ичинен 1 миллиард 400 миллион сомун акчалай түрдө бюджеттин эсебине которгон. Калган 600 миллион сомду болсо, анын баасына тете бир соода борборун жана тогуз батир үйдү өткөрүп бергенин Камчыбек Ташиев билдирди. «Анын ичинен сегиз батир үй УКМКнын кызматкерлерине, бир чоң аянттуу батир үй балдар үйүнө өткөрүп берилет. Матраимовдун өлкө ичиндеги кылмыш иштери боюнча тергелип бүттү, ал жакын арада сотко ашат», — деди ал.
Ташиевдин айтымында, 2 миллиард сом деген сумма тергөө тарабынан аныкталган жана Матраимовго карата козголгон кылмыш иши уланат, үй камагында кала берет. «Матраимов өзү биз менен кызматташууну каалады. Мамлекетке кантип зыян келтиргенин өзү кенен айтып берди. Бир эпизодун айтып берейин. Кытайдын чек арасынан Кыргыз өлкөсүнө өткөн ар бир жүк ташуучу унаадан 500 доллардан 3 миң долларга чейин алганбыз деди. Кандайдыр бир деңгээлде келтирилген зыяндын суммасы ал жетектеп турган мезгилдеги унаалардын санынан улам келип чыкты», — деди Ташиев.
Кылмыш иши уланып жатканы боюнча мындан ары анын тышкы байланыштарга, контрабандага тиешеси бардыгы же жоктугу тергелерин айтты. «Матраимовдун чет өлкөлөрдөгү, тагыраагы Дубайдагы, АКШдагы, Европа өлкөлөрүндөгү мүлктөрү текшерилет. Эгерде табылса жана анын мүлктөргө тиешеси бардыгы далилденсе, анда мыйзамдуу чаралар көрүлөт», — деди УКМКнын төрагасы.
Матраимов 20-октябрда УКМК тарабынан кармалып, бирок тергөө менен кызматташканы үчүн эч жакка кетпөө жөнүндө тил каттын негизинде камакка алынган эмес. УКМК Матраимовдун мамлекетке 2 миллиард сом зыян келтирди деп шектелип жатканын, бул сумманы ноябрь айынын аягына чейин бюджеттин эсебине которорун маалымдаган болчу.
Ушул эле айда адегенде Райымбек Матраимов, ага удаа эле жубайы Уулкан Тургунова АКШнын “кара тизмесине” кирген.
