Жогорку Кеңештин бүгүн, 12-марттагы жыйынында депутат Султанбай Айжигитов 10 мүнөт убакыт сурады. Бул сунушу добушка коюлуп, бирок өткөн жок.
«Эми мага сөз да бербейсиңерби? Муну кандай деп түшүнсө болот? Мыйзам деген барбы? Уялбайсыңарбы? Сөз берип койгула да. Фракциядан чыкканым тууралуу айтып коёюн деп жатам. Андан башка эч нерсе айтпайм, чек ара тууралуу да унчукпайм. Сөз берип койгула. Бет деген барбы?» — деген ал бул сунушту дагы бир жолу добушка коюуну суранды.
Төрага сунуш бир эле жолу добушка коюларын айтып, «экинчи жолу добушка койбойм» деди.
Жогорку Кеңештин өткөн жумадагы жыйынында депутат Султанбай Айжигитов трибунада сөз сүйлөп, кыргыз-тажик чек арасы боюнча позициясын билдирген. Ал 7 күндөн бери эч нерсе деп унчукпай келгенин, документтерди карап чыкканын айткан. «Биздин эгемендүүлүгүбүз боюнча сөз болуп жатат. Лейлек, Сүлүктү анклав болуп калган абалга келип калышыбыз мүмкүн» деген ал.
Ошол эле күнү “Ыйман Нуру” фракциясы Султанбай Айжигитовду фракциядан чыгарган.
Депутаттын айткандары боюнча өлкө башчы Садыр Жапаров да үн катып, «Демагогия, жалаң демагогия. Бул киши үч күндө пикирин алмаштырып башкача сүйлөп чыкканы түшүнүксүз. Эмнеге минтти изилдеп көрүшүбүз керек. Бул киши баарын билет, түшүнөт, беш колундай билет. Бирок эмнегедир башка дагы көп маселелерде билмексен болуп эле провокация жасай бергенин байкап жүрөм» деген.
