Улукбек Кочкоров министрликти тапшырып бергени тууралуу кабары жок болгонун, кызматтан өз каалоосу, өз арызы менен кеткенин интернеттен билгенин жарыялады. Ал бул тууралуу социалдык тармактагы баракчасы аркылуу билдирди.
27-октябрда Эмгек жана социалдык өнүктүрүү министрлигинен Улукбек Кочкоров бошотулганы жана ага президенттин милдетин аткаруучу Садыр Жапаров кол койгону маалым болгон. Эртеси аталган кызматка вице-премьерликтен бошотулган Аида Исмаилова талапкер катары көрсөтүлгөн. Бирок Исмаилова Жогорку Кеңештин депутаттарынан бир топ сын пикирлерди угуп, жыйынтыгында колдоо тапкан эмес.
Улукбек Кочкоров да, Аида Исмаилова да 4-октябрда өткөн парламенттик шайлоого бийликчил “Биримдик” партиясынын катарында катышкан. Кочкоров тизмеде 2-катарда, ал эми Исмаилова ошол эле партиянын тизмесинде 36-катарда болгон.
