Казакстандын Транспорт министрлиги Актауга жакын жерде кырсыкка учураган Azerbaijan Airlines (AZAL) учагынын кыйрашы боюнча иликтөөнүн алгачкы жыйынтыктары менен алдын ала отчетун жарыялады. Бул тууралуу Tengrinews.kz басылмасы жазды.
Баяндама 53 беттен турат. «Бул отчетто берилген маалымат алдын ала болуп саналат жана изилдөөлөрдүн жана бардык материалдарды изилдөөнүн натыйжалары боюнча такталышы жана толукталышы мүмкүн. Иштер аяктагандан кийин авиациялык кырсыкты иликтөөнүн жыйынтыгы боюнча акыркы отчет даярдалат», — деп айтылат документте.
Мындан тышкары, отчетто комиссия аба кемесинин конструкцияларынын бузулушун деталдуу иликтөөнү улантып жатканы көрсөтүлгөн. «Сакталган фрагменттерди алгачкы текшерүүдө фюзеляждын, килдин жана стабилизатордун куйрук бөлүгүндө, бийиктиктин жана багыттын рулунда ар кандай өлчөмдөгү жана формадагы көптөгөн өтүүчү жана тешиксиз бузулуулар аныкталган. Ушундай эле зыян учактын сол кыймылдаткычында жана сол канатында, ошондой эле учактын агрегаттарында жана тетиктеринде табылган. Кээ бир жерлерде зыян тик бурчтуу формада болгон», — деп жазылат отчетто.
2024-жылдын 25-декабрында Актау аэропортунан үч чакырым алыстыкта Азербайжандын AZAL авиакомпаниясынын Embraer самолетунун катышуусундагы трагедиялуу авиакырсык болгон. Баку-Грозный рейсин аткарган учак чукул конууга аракет кылып жатып кырсыкка учураган. Бортто 62 жүргүнчү жана экипаждын 5 мүчөсү болгон. Бул ишти иликтөөдө Азербайжандын, Орусиянын адистери, эл аралык эксперттер жана Embraer өкүлдөрү катышууда.
