Кечээ, 19-мартта Стамбулда жана Түркиянын башка шаарларында келе жаткан президенттик шайлоодо түрк лидери Режеп Тайып Эрдогандын негизги атаандашы деп эсептелген Стамбулдун мэри Экрем Имамоглунун кармалышынан кийин нааразычылык акциялары башталды.
Нааразычылык акциялары Стамбул провинциясынын губернаторунун алдыдагы төрт күн бою көчө нааразычылык акцияларын өткөрүүгө тыюу салуу буйругуна карабастан башталган. Мэрдин жубайы Дилек Имамоглу анын кармалышын «Түркиянын болочок президентин жок кылууга багытталган атайын жасалган саясий операция» деп атады.
Тараган видеолордон полиция Стамбул университетинин аймагында Имамоглунун жогорку билими боюнча дипломун жокко чыгаруу чечимине нааразы болгон студенттерди атайын каражаттарды колдонуп таркатканын көрүүгө болот. Анын дипломун жокко чыгаруу чечими ал кармалганга чейин чыккан. Диплому жок ал президенттик шайлоодо ат салыша албайт эле. Республикалык элдик партиянын келерки жекшемби күнкү курултайында Экрем Имамоглу 2028-жылы боло турган президенттик шайлоого катыша турганын жарыяламак дешүүдө.
Имамоглу коррупция жана террордук уюмдар менен байланышы бар деп шектелүүдө. Тергөөнүн алкагында 100гө жакын адам кармалганы, анын ичинде саясатчылар, журналисттер жана ишкерлер болгону маалымдалган. Имамоглу камакка алынгандан кийин анын социалдык тармактарында “элдин эркин коркутуу же мыйзамсыз аракеттер менен басууга болбойт” деген билдирүү пайда болгон.
Имамоглунун кармалышынан кийинки нааразычылык акциялары борбор калаа Анкарада жана Түркиянын башка шаарларында да өттү. Жекшембиде өлкө боюнча ири нааразычылык акциялары уланышы мүмкүн деп күтүлүүдө.
