СЕРЕП МЕДИА маалымат агенттиги үстүбүздөгү 2022-жылы үйлөнүп, турмушка чыккан атактууларды тизмектеди.

1. Жолборс жылында ырчы Кызсайкал Кабылованын сүйүктүүсү Мирлан анын колун сурап, түгөйлөр турмуш жолуна аттанышты. Ал жигити менен 1-класстан бери тааныш жана эң жакын досу экенин айтып, бактысын алыстан издеп жүрсө, көрсө, жанында эле жүргөнүн билдирген. Кызсайкал Кабылованын сүйүктүүсү 31-октябрда ырчынын туулган күнүндө колун сураган.

2. Блогер Дастан Махамадмурза 28-ноябрда сүйүктүүсү Хадича экөө баш кошуп, той өткөрүштү. «Келинчегим 2004-жылы Баткен облусунун Сүлүктү шаарында төрөлгөн. Той 28-ноябрда өттү. Менин оюмча мыкты өттү деп ойлойм», — деген ал. Тойдо түгөйлөр ата-энелерине умрага жолдомо беришти.

3. Экөөнүн таанышуусу жана сүйүүсү бир «лайктан» башталганын айтышкан Максат Надырбеков 15-ноябрда сүйүктүүсүнө баш кошту. «Таанышканыбызга 1,5 жыл болуп калды. Инстаграмдан таанышканбыз. Анан жолуктук. Башында 4-5 ай байке-карындаш болуп жүрдүк. Анан ушул чекке келдик. Негизи август айында үйлөнөбүз дегенбиз», — деген Надырбеков.

4. «Рецепт счастья» киносундагы актёр, алып баруучу Ырысбай Жумаев да үйлөндү. Ал август айында сүйүктүүсүнүн колун сураган. Түгөйлөрдүн үлпөт тою 12-октябрда Бишкектеги тойканалардын биринде жакындарынын курчоосунда өттү.

5. Ырчы Адилет Азимов менен продюсери Зарина Кыдыралиеванын үлпөт тою Бишкектеги тойканалардын биринде 29-январда өттү. Атасы уулунун үйлөнүү тоюн 7 жыл күткөнүн айткан.

6. 20-июлда актёр, вайнер Улан Эсенакунов сүйүктүүсүнө баш кошту. “Жубайым Нуриза 2001-жылы туулган. Чаткалдын кызы. 5 ай сүйлөштүк, ошол учурда анын менин адамым экенин түшүндүм. Шаан-шөкөтү жок эле колун сурадым»,- деген ал.

7. 4-июнда тамашоучу, актёр, вайнер Шумкар Бейшеналиев үйлөндү. «Келинчегинин аты Камила. Чыгармачылыктан алыс адам», — дешкен достору.

8. 21-августта “Акыркы сабак” сериалындагы Кутман Айылчиев менен Океана Урматбектин үйлөнүү тою өттү. Ырчылар Аваз Акимов менен жубайы Айдана Дека жаш түгөйлөргө өкүл ата, өкүл апа болгон.

9. 10-сентябрда Бишкектеги тойканаларын биринде блогерлер Медер Нуркадыров менен Нуриза Бектурованын үйлөнүү тою өттү.

10. Ырчы Мурадил Данияров 16-майда сүйүктүүсүнүн колун сурап, той өткөрдү. Ал туулган күнүндө ата болорун жар салды.

11. 26-августта Бишкектеги тойканалардын биринде ырчы Аяна Касымованын үлпөт тою өткөн. 31-март күнү 23 жашка толгон Аяна Касымова туулган күнүн белгилеп жатканда сүйүктүүсү колун сураган. 23-июнда анын кыз узатуу тою өткөн.

12. Май айында актёр Бектур Усенов менен сүйүктүүсү Айзат баш кошту. Эки жаштын үлпөт тою борбордогу тойканалардын биринде орун алып, ага жаштардын ата-эне, бир туугандары, жакындары жана чыгармачылыктагы кесиптештери чакырылган.

13. 3-август күнү Бишкек шаарындагы тойканалардын биринде актриса Айгерим Саматованын кыз узатуу тою өттү. 18-июль күнү ырчы Мадияр Русланов сүйүктүүсү, актриса Айгерим Саматованын колун сураган. Ошол күнү актриса Мадияр мырза менен 6 жылдан бери кыз-жигит катары сүйлөшүп жүргөнүн ачыктаган.

14. 11-июль күнү Бишкектеги тойканалардын биринде актёр, вайнер Нуркул Адылбеков менен актриса Мадалена Абдрахманованын үйлөнүү тою өттү. 1-июнь күнү Нуркул Адылбеков сүйүктүүсү Мадаленанын колун сураган. 8-июль күнү актёр Арнис Кыдырмышев менен жубайы, кесиптеши Альбина Имашова тун кызын турмушка узатышкан.