Бүгүн, 25-декабрда Вера Алентова көз жумду, Эл артисти 83 жашта болгон. Бул тууралуу ал 60 жыл кызмат кылган Пушкин атындагы театрдан билдиришти. Актрисага кеңири таанымалдыкты анын жолдошу Владимир Меньшов тарткан «Москва көз жашка ишенбейт» тасмасындагы башкы ролу алып келген. Бул фильм «Оскар» сыйлыгына татыган.
«Биздин кайгыбыз чексиз. Коштошуу аземинин күнү жана жери тууралуу кошумча маалымат берилет», — деп айтылат театрдын билдирүүсүндө. Кийинчерээк театрдын көркөм жетекчиси Евгений Писарев ТАСС агенттигине коштошуу аземи Пушкин атындагы театрда өтөрүн тактады.
Msk1 басылмасынын маалыматына караганда, Алентова 25-декабрда күндүз Маяковский атындагы театрда эл артисти, актёр Анатолий Лобоцкий менен коштошуу аземине катышкан. Азем учурунда анын абалы начарлап, тез жардам дарыгерлерине өткөрүлүп берилген. РЕН булагы актрисанын клиникалык өлүм абалында ооруканага жаткырылганын билдирген.
Вера Алентова — театр жана кино тармагындагы орусиялык актриса, МХАТтын мектеп-студиясынын бүтүрүүчүсү. Ал эң көп жолдошу Владимир Меньшов тарткан жана 1979-жылы экранга чыккан «Москва көз жашка ишенбейт» тасмасындагы Катерина Тихомирова ролу аркылуу таанымал болгон. Бул картина «Чет тилдеги эң мыкты фильм» номинациясында «Оскар» сыйлыгына татыган.
Алентова Меньшов менен режиссёр 2021-жылы көз жумганга чейин, 50 жылдан ашык убакыт никеде жашаган. Алардын Юлия Меньшова аттуу кызы бар — ал белгилүү орусиялык телеалпаруучу жана актриса.
«Москва көз жашка ишенбейт» фильми Россияда да, чет өлкөлөрдө да чоң ийгиликке жеткени менен — аны 1980-жылы эле 84,4 миллион адам көргөн — прокатка чыгар алдында Меньшов айрым ачык көрүнүштөр үчүн дооматтарга туш болгон. «Мосфильмдин» көркөм кеңеши айрым эпизоддорду кыскартууну сунуштаган, бирок акыры картина ошол кездеги башкы катчы Леонид Брежневге көрсөтүлүп, ага жаккан.
Алентова өзү тасма чыккандан кийин көптөгөн аялдардан кат алганын, алар анын каарманынан өздөрүн көрүшкөнүн айтышканын эскерген. «Менимче, мындай сыноодон борбор калаага келген ар бир кыз, дүйнөнүн кайсы бурчунда болбосун, өтөт», — деп белгилеген актриса.
Алентова тартылган башка фильмдердин катарына «Учуу күндөрү» (анын экрандагы дебюту), «Каалоолор мезгили», «Эртең согуш болду», «Ширли-Мырли» тасмалары кирет.
