Рэп аткаруучу Бакр аны Орусиянын аймагына киргизбей коюшканын билдирди.

«17-ноябрда Москва убактысы боюнча таңкы 07:45те командабыз менен Орусия боюнча уюштурулган турга учканбыз. Москва шаарындагы Шереметьево аэропортуна кондук. Паспорттук көзөмөлдөн бүт команда өттү, бирок мени өткөрүшпөй, документтеримди эч кандай түшүндүрмө бербестен алып коюшуп, үч саатка жакын күттүрүштү.

Кийин мага Орусиянын аймагына кирүүгө тыюу салынганы тууралуу билдиришти — себептери да түшүндүрүлгөн жок. Мени күтүү бөлмөсүнө жайгаштырып, Бишкекке кайтуу үчүн билет сатып алууга туура келди. Ал жерде мен таңкы 10дон кечки 9га чейин отурдум.

Бишкекке келгенде мага «Орусияга кирүүгө уруксат берилген эмес» деген негизде киргизүүдөн баш тартуу тууралуу токтом беришти. Азыркы учурда командабыз менен юристтерге кайрылып, кийинки укуктук иштер үчүн даярдык көрүп жатабыз.

Бул жагымсыз кырдаал үчүн терең кечирим сурайм. Алланын каалоосу менен жакын арада сөзсүз жолугабыз. Сиздерди кабардар кылып турам. Колдооңуздар жана түшүнүүңүздөр үчүн чоң рахмат», — деп жазган ырчы.