Баткенде милиция кызматкерлери адам өмүрүн сактап калышты. Бул тууралуу ИИМден билдиришти.
Баткен облусунда өткөрүлгөн Эл аралык ыр майрамында милиция кызматкерлери коомдук тартипти жана жарандардын коопсуздугун камсыз кылууда активдүү иш алып барышты.
Сүлүктү ШИИБдин Коомдук коопсуздук кызматынын милициянын аймактык ыйгарымдуу өкүлү Музаффар Чокуев эпилепсиясы кармаган 30 жаштагы жаранды эл көп болуп, ызы-чуу түшкөн учурда биринчи жардам көрсөтүп, анын өмүрүн сактап калды.
Ошондой эле, Кадамжай РИИБдин Коомдук коопсуздук кызматынын улук милициянын аймактык ыйгарымдуу өкүлү Тынчтыкбек Топчубаев Ак-Турпак айылынын тургунунун 2 айлык наристеси дем албай, дене-башы көгөрүп калганын байкап, наристени колуна алып, Жол кыймылынын коопсуздугун камсыздоо бөлүмчөсүнүн кызматкери Мустафахан Акматовдун кызматтык унаасына салып, алгачкы медициналык жардам көрсөтүп, жасалма дем алдырып, наристени өзүнө келтирип, Тез жардам бөлүмүнө жеткиришкен.
