АКШда кыргызстандык жубайлар баласы менен киши колдуу болгон. Тышкы иштер министрлигинен Кыргыз жарандары: 1980-жылы туулган М.А., анын 1977-жылы туулган жубайы А.Б. жана алардын 2019-жылы туулган уулу М.А.нын жансыз денелери табылганын маалымдашты.
GoFundMe краудфандинг платформасынын сайтында маркумдар тууралуу маалымат жарыяланып, алардын сөөгүн мекенге жеткирүү үчүн акча чогултулуп жатканын билдиришти.
«Кылмыштуу кара ниеттиктин кесепетинен үч адамдан турган үй-бүлөнүн, анын ичинде 5 жашар баланын кайгылуу өлүмү бизди жердештердин коомчулугуна жана башка кайрымдуу адамдарга кайрылууга мажбур кылууда. Аларды Кыргызстанга мекенибизге алып келүү үчүн биздин мүмкүнчүлүгүбүз жетпеген каражат керек. Сиз берген ар бир цент үчүн биз түбөлүк ыраазы болобуз. Азамат менен Бермет 2012-жылы АКШга келишкен. Кыйынчылыктарга карабай күнү-түнү иштеп, талыкпаган эмгектин аркасында жүк ташуучу айдоочулардын бизнес коомчулугуна кошула алышкан. 2019-жылы алар көптөн бери кыялданган, көптөн күткөн балалуу болушту.
Уулу «өзгөчө» бала болчу, бирок анын мээримдүү ата-энеси үчүн бул тоскоолдук болгон эмес. Алар аны жакшы көрүп, чоңойтушкан, ага жанынын, жүрөгүнүн бир бөлүгүн кошуп өстүрүп жаткан кези болчу. Бермет өмүр бою максатка умтулган, эмгекчил, чындап боорукер адам болгон. Жардам тууралуу укса, ал ар дайым өз салымын кошконго аракетин жумшачу, азыр анын жакындары жардамга муктаж. Ал 47 жашта болчу. Азамат бизге атадай, биз үчүн бекем таяныч, сыймык болгон ак көңүл адам эле. Ал 45 жашта болчу. Аминчик , бейкүнөө, көптөн күткөн ата-энесинин бактысы эле. Ал 5 жашта болчу», — деп айтылат маалыматта.
