Бишкектеги Арча-Бешик конушундагы үйлөрдүн бирине баштыкка салынып, куту менен кошо ыргытылган ымыркай табылган.
Ленин РИИБ окуя 19-ноябрда саат 22:45 чамасында катталганын билдирди. Милицияга Арча-Бешик конушундагы үйлөрдүн биринин алдына жаңы төрөлгөн ымыркайды баштыкка байлап, кутуга салып кеткени тууралуу маалымат түшкөн. Учурда энесин издөө жүрүп жатат.
Ал эми редакция ымыркайды төрөтканага алып барган Милициянын кайгуул кызматынын кызматкери Толкунбек Ташматов менен байланышканда, окуя болгонун тастыктады. «Бизге ымыркай жатат деген маалымат түшкөндө бардык. Абалы начар болчу. Дене табы түшүп кетиптир. Оозунда кагаз болгону чын. Азыр дене табы калыбына келди дешти. Бир аз кечирээк болгондо чарчап калмак экен. Уул баланы 2-төрөтканага алып бардык», — деген.
СЕРЕП МЕДИА маалымат агенттиги ымыркайдын абалын билүү үчүн Саламаттыкты сактоо министрлигине кайрылганыбызда, ымыркайдын жандандыруу бөлүмүндө жатканын билдиришти. «Тирүү, жандандыруу бөлүмүндө. 2-төрөткананын дарыгерлеринин көзөмөлүндө», — дешти.
