Нурдан Орунтаев «Нарын облусу каралбай калды» деген пикирлер боюнча өз оюн билдирди

Курулуш министри Нурдан Орунтаев «Нарын облусу каралбай калды» деген пикирлер боюнча өз оюн билдирди.

«1991-жылдан баштап 2020-жылга чейин Курулуш министрлиги тарабынан капиталдык салымдар беренеси боюнча бардыгы биригип болгону 83 объектинин курулушу жана капиталдык оңдоо иштери жүргүзүлгөн.

2021-2024-жылдары президенттин тапшырмасы менен 3,6 миллиард сом сарпталып, бардыгы биригип 65 жаңы курулуш объектилери бүткөрүлгөн. Ал эми 2025-жылга карата Республикалык бюджеттен Нарын облусундагы социалдык объектилерди куруу жана капиталдык оңдоп-түзөөдөн өткөрүү боюнча бүгүнкү күндө 92 объектиге 921 миллион сом бөлүнүп, жумуштар жүргүзүлүүдө. Бул сумма 6 айдын гана жыйынтыгы.

Анын ичинде:

Курулуп жаткан — 11 мектеп, 12 бала бакча, 3 саламаттык сактоо, 1 маданият үйү, 1 спорттук комплекс жана 4 административдик имарат бар. 

Капиталдык оңдоодо – 24 мектеп, 3 бала бакча, 1 маданият уйу жана 1 спорт комплекси бар.

Мындан тышкары, долбоордук-сметалык документтери дайындалып курулушу баштала турган объектилер: 7 мектеп, 11 бала бакча, 2 саламаттык сактоо, 3 маданият үйү жана 6 спорттук объектилер бар. Аталган объектилердин курулуш иштери жакынкы арада башталат.

Урматтуу Нарын облусунун тургундары жана коноктору, аталган ар бир объект президент Садыр Жапаровдун жеке көзөмөлүндө турат жана «Нарын облусу каралбай калды» деген пикирге дал келбейт.

Менин жеке оюм, Нарын обусунда бүгүнкү күндө мектеп жана башка социалдык объектилер боюнча маселе башка облустарга караганда аз. Бирок, ага карабастан курулуш жана капиталдык оңдоп түзөө иштери улантыла берет. 

Дагы айта кетчү нерсе облуста болуп жаткан башка булактардан курулуп жаткан социалдык объектилер да арбын. Курулуш жана өндүрүш тармагында салынып жаткан инвестициялар да көп, анын ичинде завод-фабрикалар, бетондук заводдор, кирпич заводдор да четинен ишке берилүүдө»,- деди ал.