5-сентябрь күнү Ысык-Көл облусунун Чолпон-Ата шаарындагы төрөт үйүндө 34 жаштагы келин төрөттөн кийин каза болгон. Маркумдун жакындары буга «Дарыгерлердин шалаакылыгы себеп болду. Артында 5 баласы калды» дешет.
«Кесаревонун айынан келинчегим көз жумду. Келгенде сонун эле толготуп келген. Врач жоктугунунан 1,5 сутка кармап, укол сайып, эч нерсе жардам беришкен жок. Толгоону кетирген укол сайып жатышты. Дарыгерди Караколдон чакыртышты. 4 саатта келип, кесарево жасашты. Азыр балдар жакшы. Издеп, күтүп жатышат. Сагына башташат. Балдардын улуусу 10 жашта, төртүнчүсү 4 жашта. Анан жаңы төрөлгөн ымыркай. Азыр апам карашууда. Төрт баланы сонун эле төрөчү. 1,5 сутка карабай коюшуп, эртеси кайра операция кылышты»,- деди ал.
«5-сентябрда Ысык-Көл районунун Бостери айылынын 1988-жылы туулган тургуну Ысык-Көл райондук ички иштер бөлүмүнө арыз менен кайрылган. Арызында 5-сентябрга караган түнү анын жубайы, 1991-жылы туулган келин Ысык-Көл райондук ооруканасынын төрөт үйүндө каза болгондугу тууралуу билдирилген. Арыз Ысык-Көл РИИБдин маалыматтарды каттоо электрондук журналына катталып, учурда сотко чейинки териштирүү иштери жүргүзүлүүдө», — деп айтылат облустук милициянын маалыматында.
