MCN Coin “криптовалютасына” алданган адамдардын 898ине 1 миллион 700 миңден ашык доллар кайтарып берилди. Бул тууралуу ИИМдин Кылмыш иликтөө башкы башкармалагынын кызматкери Данияр Закиров “Биринчи радиого” берген маегинде билдирди.
Ал MCN coin’ге каражат салып кайра ала албай калган адамдар дагы деле арыз берип, алар териштирилип жатканын кошумчалады. “Бул боюнча 2024-жылдын 12-сентябрында кылмыш иши козголгон. Азыр тергөө жүрүп жатат. Материалдар Октябрь жана Биринчи май райондук милициясында каралууда”, — деди Закиров.
Буга чейин УКМК MCN Coin «криптавалютасынын» уюштуруучулары делген 2 адамды 5-апрелге чейин камакка алган. Шектүүлөрдүн бири Исрадин Субанбеков МСN Coin иштегенине 1,5 жыл болгонун айткан. Анын айтымында, өзүнүн туруктуу блокчейни жок. “Мунун баары алдамчылык болчу. Кыргыз элимден кечирим сурайм! Өзүбүздүн кызыкчылык үчүн иштеп, элиталык үй алдым, Lexus 570 машина алдым, жалпы жонунан 2,5 миллион доллар пайда таптым. Жети облусту кыдырып, мыйзамсыз иштедик. Азыр элдин акчасын кайтарып бере албайбыз. Промоушндарды калп айтып уюштурганбыз” деген ал.
