Ош шаардык соту жаранды анын аялын жана карындашын сабаган деп шектелген эки бир туугандын баш коргоо чарасын тандады. Бул тууралуу соттун басма сөз кызматынан билдиришти.
Маалыматка караганда, алар 2 ай камакта болот.
- 9-ноябрь күнү милицияга Ош шаарынын Абдыкадыров көчөсүндө белгисиз тараптар мушташып жаткандыгы боюнча кабар түшкөн. Милиция бул факты боюнча Ош шаарынын 1994 жана 1995-жылы туулган бир туугандарды кармаган. Шектүү катары кармалгандардын бири, 1994-жылы туулган жаран өз үйүндө аялына кол көтөрүп, ызы-чуу чыгарган. Аялы өзүнүн 1993-жылы туулган бир тууган агасын жардамга чакырган. Бирок шектүү аялынын агасын, анын аялын жана өз карындашына бир тууган иниси менен бирге кол көтөрүшүп, денелерине залал келтирген. Алгач бул факты боюнча бейбаштык беренеси менен иш козголгон. Бирок 22-ноябрда чыккан соттук-медициналык экспертизанын жыйынтыгы менен шектүүнүн кайын агасынын жарааты оор деп табылып, бейбаштык беренесинен денеге оор залал келтирүү беренесине өзгөртүлгөн. Тергөө уланууда.
