«Көрсө, Атамбаев айкөл экен. Азыркы бийлик да өч алуудан чыга албай жатат». Бул тууралуу экс-депутат Жылдызкан Жолдошова соцтармактагы баракчасында жарыялады.
«Эгемендүүлүккө ээ болгон жылдардан кийин ар бир президент коомго жазылбаган мыйзамдын негизинде терс нормаларды киргизишкен жана киргизип келе жатышат. Тилекке каршы, президенттер бийликтерин мыкчып турганда, ошол «нормалар» бир кезде кайра өзүнө кыянатчылык кылбай тургандай сезишет окшойт. Бирок жашоо бумеранг.
Алмазбек Атамбаев бийликте турганда Утурумдук өкмөттүн айрым мүчөлөрүнүн «козуткандарынын» негизинде эки терс «норманы» киргизип кетти. Бирок аягында жалгыз Алмазбек Шаршенович азап чегип келе жатат. Ал эми козуткандардын бири элчи болсо, экинчиси азыркы президент Садыр Жапаров менен өбүшүп учурашып, кеңешин берип жүрөт. Калгандары эч капачылыгы жок, куунап жашап жүрүшөт.
Ал кандай » нормалар» эле?
Биринчиси — «өч алуу айлампасын» биздин коомго толук кандуу киргизишти. Керек болсо, азыркы бийлик да андан чыга албай жатат.
Экинчиси — тастыкталбаган, далили жок, бирөө арыз жазып койсо эле шарт «камап коюу» ыкмасын киргизишкен.
Бирок менин айтайын дегеним негизинен башка нерсе болчу. Батукаевдин маселеси — бул Ош окуясынын алдында кичинекей эле маселе. Эмне себептен Садыр Жапаровдун бийлиги Ош окуясынын аягына чыкпай жатат? Күнөөкөрлөрдү жазалоонун ордуна мамлекеттик кызматка койгонун кандай түшүнсө болот? «Утурумдук өкмөттүн бир да мүчөсү Ош окуясы боюнча «жазаланбаса», анда эмнеге мынча Алмазбек Атамбаевге өчөшүп алдыңар?» деген суроо туулат.
Акыйкаттык үчүн айтып коёюн, Садыр Нургожоевич, Камчы Кыдыршааевич, Талант Турдумамбетович акыйкатсыз камалып жатканыңарда, ооруп калганыңарда Алмазбек Шаршеновичке мен кирип, сиздерди ооруканага которуу боюнча келтирген суранычты четке какпайт эле, дайыма макулдугун берчү, жок дебей. Ачыгын айтайын, көрсө Алмазбек Атамбаев айкөл, сиздерге адамгерчиликтүү мамиле жасаган экен.
Дагы кошумча айта турган нерсе, бир да ооруканалардын башкы дарыгери сиздерди кабыл албаганда, бир гана Сабырбек Жумабеков кабыл алып, алты айлап дарылап эле тим болбостон, сиздерди калкалап келген. Алмазбек Атамбаев буга да көз жумуп койчу.
А сиздер эмне үчүн, жок дегенде, Алмазбек Атамбаевди ооруп жатса, дарылоого уруксат бербей жатасыңар? Эгерде Ош окуясынын «чындыгын, күнөөкөрлөрүн иликтебей турган болсоңор», калганы эч нерсеге арзыбайт. Менин жакшы көргөн инилерим, оор күндөр келе жатат. Биздин тарыхта болбогондой, бизге ынтымак керек. Ошондуктан, суранам сиздерден «өч алуу айлампасынан» чыккыла жана
калыстыктан тайбагыла», — деп жазылат экс-депутаттын билдирүүсундө.
15-мартта Жогорку Сот мурдагы өлкө башчысы Алмазбек Атамбаевге карата кримтөбөл Азиз Батукаевдин мыйзамсыз бошотулушу боюнча өкүмдү күчүндө калтырган.
