Президентинин Нарын облусундагы ыйгарым укуктуу өкүлү Алтынбек Эргешов Күрөш федерациясынын кыз-келиндер күрөшү боюнча вице-президенти Айсулуу Тыныбекова менен жолукту.
Жолугушууда облус башчысы дүйнөлүк спорт аренасында Тыныбекованын өлкөнүн туусун бийик көтөрүп келе жатканына сыймыктанарын айтты. Облуста спорттун түрлөрүн өнүктүрүү боюнча иш алып барылып, андан сырткары келечекте Кочкор районуна дүйнөнүн 3 жолку чемпиону Тыныбекова атындагы спорт комплекс салуу мүмкүнчүлүгү каралып жатканын маалымдады. Ошондой эле спортчуга үй-бүлөлүк бакыт, ишине ийгиликтерди каалады.
Ал эми Тыныбекова Нарындын тургундары жылуу кабыл алганына ыраазычылык билдирип, аны менен катар, жергиликтүү бийлик күрөштүн өнүгүүсүнө колдоо көрсөтөрүнө ишеним артып жатканын билдирди.
Күрөш федерациясынын өкүлдөрү Нарын облусуна 27-28-февраль күндөрү иш сапары менен болгон.
