Эр-Риядда өткөн беттеште жеңил салмакта дүйнөнүн абсолюттук чемпиону наамы үчүн титулдук реванш өткөргөн Дмитрий Бивол туулган жери, балалыгы, бокс жөнүндө кыска маек берди. Анда спортчу Кыргызстанда туулганын, өзүн накта Советтер Союзунун баласы сезээрин айткан.
«Мекеним Советтер Союзу болуп саналат. Кыргызстанда төрөлдүм, ал жерде эң сонун балалыгым өткөн. Менин атам молдаван, апам корей кызы. Орус тилинде сүйлөйм. Орусияда жашайм, — деген ал.
Маек учурунда кайсы өлкөнүн желеги астында чыгаарын ачыктаган Бивол: «Ачык айтайын, Кыргызстандын желеги астында чыкпайм. Мен эч качан Кыргызстанда туулганымда четке какпайм. Бул өлкөнү сүйөм, ал менин бир бөлүгүм. Акыркы эки беттеште желексиз эле чыктым. Бирок уюштуруучулар Кыргызстандын желегин кошуп коюшуптур. Жагымдуу болду. Негизинен Орусиянын туусу астында ойнойм», — деген.
Маек Лос-Анжелесте өткөн Азия кинофестивалында алынып, Максим Полетаевдин ютуб каналына 20-февралда чыккан. Ал 11 ирет дүйнө чемпиону курун коргогондугун айтып: «Мен чемпиондук кур кимде болсо, ошону алууга жортуулга чыгам. Анын ээси ким экендиги кызыктырбайт, мени кур кызыктырат», — деген.
Бокско келчү жаш спортчуларга «бирөөнү уруп-согуу үчүн бул спортко келбегиле, коргонуу үчүн келгиле» деген Бивол боксту сүйүү керектегинин айткан. Бокс шахмат же футбол эместигин, олуттуу мамиле жасоо керектигин кошумчалаган.
