Балбан Айсулуу Тыныбековага тапшырылган үйдүн тагдыры бир жылдан ашуун убакыттан кийин чечилди. Кечээ Бишкек шаардык кеңеши спортчуга муниципалдык үйдү кайтарымсыз иретте өткөрүп берүү токтомунун долбоорун жактырды.
Ошентип кыргыз тарыхындагы кыз-келиндер күрөшү боюнча алгачкы дүйнө чемпиону Москва көчөсү, 191 дарегинде жайгашкан көп кабаттуу үйдөгү муниципалдык үч бөлмөлүү батирге ээ болду.
Ал батир үйдүн сертификатын 2019-жылы экс-президент Сооронбай Жээнбеков дүйнөлүк чемпионаттагы жеңишинен кийин Айсулуу Тыныбековага тапшырган эле. Бирок кийин кыймылсыз мүлктүн муниципалдык менчикте турары ачыкталган. Бул батир үй экс-мэр Нариман Түлеевдин соттун чечиминен кийин конфискацияга алынган кыймылсыз мүлктөрдүн бири.
