«Орусиядагы эмгек мигранттарынын жүрүм-турумуна көзөмөлдү күчөтүү керек. Бирок Борбор Азия өлкөлөрүнүн бардык жарандары үчүн виза режимин киргизүүгө каршымын». Мындай пикирин Орусиянын тышкы иштер министри Сергей Лавров жергиликтүү басылмаларга билдирди.
Министр белгилегендей, учурда мигранттарга көзөмөлдү күчөтүү үчүн кошумча чаралар көрүлүп жатат. Бирок алар эмгек миграциясына тоскоол болбойт. Анын айтымында, Борбор Азия, Кавказ жана башка мурдагы советтик республикалардан келген мигранттарга мамилени күчөтүү Орусиянын узак мөөнөттүү кызыкчылыктарына жооп бербейт.
Буга чейин Орусиянын Мамлекеттик думасынын депутаты Сергей Миронов Борбордук Азия өлкөлөрү менен кайрадан виза режимин киргизүүгө чакырган. X соцтармактагы баракчасында ал муну Москвадагы мигранттардын соңку рейддери менен байланыштырган. Мындай чара миграциялык агымдарды көзөмөлдөөгө жардам берерин жана күч түзүмдөрүнө болгон оорчулукту азайтары айтылды.
