Акыйкатчы Жамиля Жаманбаева бир жылдай убакыттан бери системалуу түрдө 9 эркек тарабынан зордукталып жүргөн 13 жаштагы кыздын укуктарын коргоону камсыз кылуу үчүн Башкы прокурордон, ошондой эле ИИМ жетекчилигинен тез арада чара көрүүнү талап кылды.
Бүгүн, 20-мартта кыздын ата-энеси Акыйкатчынын жеке кабылдамасында болуп, жашы жете элек кызынын укугун коргоп берүүнү өтүнгөн. Алар укук коргоо органдары күнөөлүү адамдарды кылмыш жоопкерчилигине тартуу үчүн чара көрбөй жатышканын айтып арызданышкан.
Кыздын апасы ыйлап, алардын үй-бүлөсүн жашы жете элек кызын зордуктап жүргөн балдардын туугандары коркутуп, кысым көрсөтүп жатышканын айтып берди. Апасынын айтымында, Сокулукта 2023-жылдын апрель айынын бери анын 13 жаштагы кызын 19-22 жаштагы 9 жигит системалуу түрдө зордуктап жүргөн. Алар кызды зордуктап, «эч кимге айтпа» деп коркутушкан. Кыз ата-энесине айткандан коркуп, бул убакыттын ичинде ал үч жолу өз жанын кыюууга аракет кылган. Ушул жылдын январь айында кыз дайынсыз жоголуп, 20 күндөн кийин гана табылган.
Жоголгон кыз табылгандан кийин, балдар менен иштөө инспекциясынын тескөөчүсүнө кандай кордуктан өткөнүн айтып берген. Ошондо гана кыздын ата-энеси окуя тууралуу билип, милицияга арыз жазышкан.
«Бирок Сокулук РИИБ тарабынан, жабыр тарткандардын айтуусу боюнча, ушул жылдын февраль айынан бери күнөөлүү адамдарды кылмыш жоопкерчилигине тартуу боюнча аракеттер көрүлбөй жатат. 13 жашар кызды 2023-жылы апрель айында 20 жаштагы жигит алдап унаасына салып кетип, шаардын четине алып барып зордуктаган. Кызды окуя тууралуу бирөөгө айтсаң 40 эркекке салып берем деп коркуткан. Андан кийин талаада жалгыз таштап кеткен. Анан кайра келип, кызды нес абалда Сокулукка алып келип, досуна үйүнө жеткирип кой деп таштап кеткен», — деп айтылат маалыматта.
“Бул окуядан кийин кызымдын жашоосу талкаланды. Аны мектептин же үйдүн жанында жигиттер аңдып, коркутуп-үркүтүп, машинага отургузуп кетип жүрүшкөн. Ата-энеңе айтып беребиз деп коркутуп зордукташкан. Кызымды 9 жигит колдон колго өткөрүп беришкен. Алар жыл бою системалуу түрдө кызымды коркутуп-үркүтүп эч кимге айттырбай зордуктап жүрүшкөн», — деп аял кызынын кандай кордук көргөнүн ыйлап айтып берген.
Кыздын ата-энеси кызын сактап калууга жана адилеттик табууга аракет кылууда. «Кыздын психологиялык абалы оор, ага атайын адистердин жардамы керек болгон. Ал учурда ооруканада. Жашы жете элек кыздын ата-энеси күнөөлүүлөргө карата кылмыш иши козголдубу жана алар жоопкерчиликке тартыларын билбейт.
Бул учурда кызды системалуу түрдө зордуктап жүргөн жигиттердин туугандары жабырлануучунун үй-бүлөсүнө кысым көрсөтүшүп, коркутуп-үркүтүп келишкен. Үй-бүлөдөгү башка балдарга да коркутуулар болгон. Ошондой күнөөлүү балдардын биринин иниси мектепте окуя тууралуу ушак тараткан үчүн кыздын сиңдисин балдар шылдыңдап, ага карата да кысым болуп жатат. Кыздын апасы бардык күнөөлүүлөрдү жоопкерчиликке тартууга жардам берүүнү суранат», — деп айтылат маалыматта.
«Алар менин кызымдын тагдырын талкалашты. Ал үч жолу өз өмүрүн кыюуга аракет кылды. Бул зөөкүрлөр мыйзамдын бардык катаалдыгы менен жазалансын. Алар адам эмес! Алар башка кыздардын да тагдырын талкалашы мүмкүн», — деп ыйлаган аял.
Акыйкатчы институтунун маалыматы боюнча, Сокулукта дагы эки жашы жете элек кыздын боюна бүтүп, 9 жигиттин бири алардын бири менен нике кыйдырган. Экинчи кыз таенеси менен жашайт, ата-энеси мигрант.
Акыйкатчы кыздын укуктарын жана коопсуздугун камсыз кылуу үчүн токтоосуз чара көрүү талабы менен тиешелүү мамлекеттик органдарга расмий каттарды даярдап жатат.
