Акыйкатчы Жамиля Жаманбаева укук коргоо органдарынын жетекчилерин зордуктоого кабылган 15 жашар кыздын укугун коргоп, кечиктирилгис чараларды көрүүгө чакырды. Бул тууралуу Акыйкатчы институтунан билдиришти.
Өспүрүм тууралуу Акыйкатчы институтуна маалымат келип түшкөндөн тарта кызматкерлер кыздын учурдагы абалына көзөмөл жүргүзүүдө. Акыйкатчы институтунун кызматкерлери кыздын өзү менен жолугушуп, анын абалынан кабар алып келген.
«Андан сырткары, маалымат боюнча укук коргоо органдарынын аракеттерине дагы мониторинг жүргүзүлүүдө. Ысык-Ата районунун Эмгек, социалдык камсыздоо жана миграция башкармалыгынын үй-бүлөнү жана балдарды коргоо бөлүмүнүн кызматкерлерине өспүрүм кыз Жалал-Абад облусунун Сузак районунун тургуну 43 жаштагы өгөй атасы 12 жашында зордуктап, андан кийин 2 жылдан ашуун ыплас ишин улантып келгенин айтып берген.
Өспүрүм кыз бул маалыматтарды сурак учурунда тастыктаган. Андан сырткары, бул боюнча апасы дагы билгенин жана ал чара көрбөстөн, кайра кызын күнөөлөп, урушуп келгенин айткан.
Кыздын айтымында, 2024-жылдын күз айларында кыздын апасы чет өлкөгө эмгек мигранты болуп иштеп кетип, 3 кызын (зомбулукка кабылган кызы мурунку турмушунан, калган экөө азыркы күйөөсүнөн) жолдошуна таштап кеткен. Бир канча убакыттан кийин, кыздарын Чүй облусунда жашаган өкүл апасына жөнөткөн. Кыз эки бир тууганы менен Чүй облусунун Ысык-Ата районунда убактылуу жашап, билим алып жаткан.
2025-жылдын апрель айында кыздарды кайрадан атасынын колуна жөнөтөр алдында, өспүрүм ыйлап, болгон окуяны аларды карап жаткан аялга айтып, Сузакка баруудан баш тартат. Убактылуу түнөк берип келген аял, бул окуяны угар замат Ысык-Ата РИИБге 16-апрелде билдирген. Милиция өспүрүмдү суракка алып, соттук-медициналык экспертиза дайындаган. Учурда жыйынтыгы чыга элек.
Ал эми кыз убактылуу балдар борборуна жайгаштырылып, жанында апасы жок болгондуктан, социалдык кызматкерлердин камкордугуна алынды. Ысык-Ата РИИБи иш боюнча материалдарды окуянын болгон жери Жалал-Абад облусунун Сузак РИИБине жөнөттү.
Ал эми Сузак райондук ички иштер башкармалыгы кыздын өгөй атасы кармалып, бул факты боюнча Кылмыш-жаза кодексинин 154-беренеси (Зордуктоо) менен кылмыш ишин козгогонун маалымдады. Учурда иликтөө иштери жүрүп жатат«,- деп айтылат маалыматта.
