Чемпиондор лигасынын 1/8 финалдык оюндарынын соңку беттештеринде мюнхендик “Бавария” Италиянын борбору Рим шаарынын “Лацио” клубун өз үйүндө кабыл алды. Ал эми экинчи оюнда лондондук “Челси” мадриддик “Атлетико” менен кез келди.
Бавария Лацио оюну Мюнхен шаарындагы Аальянц Арена стадионунда өттү. Беттеште Бавария 2:1 эсебинде жеңип, жалпы эсеп 6:2 болуп Бавария чейрек финалга жолдомо алды.
Беттештин журүшүндө мюнхендик клубдун чабуулчусу Роберт Левандовский 33-мүнөттө 11 метрлик пенальтиден эсепти ачты. Оюндун 71-мүнөтүндө алмашууга чыккан Бавариянын чабуулчусу Эрик Шупа-Мотинг 73-мүнөттө эсепти 2:0 го айландырды. Ал эми Лацио клубунун жарым коргоочусу Марко Пароло 82-мүнөттө, айып соккудан көтөрүлгөн топту башы менен дарбаза торуна багыттап эсепти кыскартты. Оюндун жыйынтыгында 2:1 эсеби менен мюнхендик клуб жеңишке жеттип, жалпы эсеп 6:2 болуп Бавария чейрек финалга чыкты.
Ал эми бул түндүн бүйүр кызыткан дагы бир беттеши Лондондун “Челси” клубу менен мадриддик “Атлетико” клубтарынын ортосундагы тирешүү болду. Беттеш Лондон шаарындагы Стэмфорд Бридж стадионунда орун алды. Оюнда мадриддик клуб чейрек финалга чыгуу үчүн болгон күчүн жумшады. Бирок Томас Тухель баштаган лондондуктар бул ирет жеңишти колдон чыгарышкан жок.
Оюндун эсебин 1-бөлүктүн 34-мүнөтүндө Челсинин жарым коргоочусу Хаким Зиеш ачты. Беттештин соңку мүнөттөрүндө лондондук коргоочу Эмерсон Палмера экинчи голду жаратып, оюнга чекит койду. Беттеште Атлетико 2:0 эсебинде жеңилүү ызасын тартып, жалпы эсеп 3:0 болуп, мадриддик клуб Чемпиондор лигасы менен коштошту. Ал эми англиялык клуб чейрек финалга чыкты.
