Буга чейин Акыйкатчы институту маалымат таратып, акыйкатчы Жамиля Жаманбаева укук коргоо органдарынын жетекчилерин зордуктоого кабылган 15 жашар кыздын укугун коргоп, кечиктирилгис чараларды көрүүгө чакырганын билдирген.
Андагы маалыматка караганда, кыз социалдык камсыздоо башкармалыгынын кызматкерлерине 43 жаштагы өгөй атасы 12 жашында зордуктап, андан кийин 2 жылдан ашуун ыплас ишин улантып келгенин айтып берген.
СЕРЕП МЕДИА маалымат агентти окуя боюнча Жалал-Абад облустук милициясына кайрылганыбызда, төмөндөгүдөй маалымат беришти.
«16-апрель күнү Ысык-Ата РИИБге райондун балдарды социалдык жактан коргоо башкармалыгынын адиси арыз менен кайрылган. Анда 1982-жылы туулган жаран көп убакыттан бери жашы жете элек 2009-жылы туулган өгөй кызына карата физикалык зомбулук көрсөтүп, зордуктап жыныстык катнашка барганын жана окуя Жалал-Абад облусунун Сузак районунун Мал базар көчөсүндө болгонун билдирген.
Аталган маалымат Ысык-Ата РИИБдин маалыматтарды электрондук каттоо журналына катталып, 2009-жылы туулган кызга карата соттук-медициналык, соттук психиатрия-психологиялык экспертизалар дайындалып, топтолгон материалдар аймактык караштуулугу боюнча Жалал-Абад облусунун Сузак РИИБине жиберилген.
19-апрель күнү Сузак РИИБдин тергөө кызматы тарабынан кылмыштардын бирдиктүү реестрине Кылмыш-жаза кодексинин 154-беренеси (зордуктоо) менен катталып, кылмыш иши козголгон. Козголгон кылмыш ишинин алкагында Сузак РИИБдин кызматкерлеринин ыкчам иш-аракеттеринин негизинде, кылмышка шектүү катары 1982-жылы туулган жаран кармалып, Сузак РИИБдин убактылуу кармоочу жайына киргизилген. Учурда тергөө амалдары жүрүп жатат»,- деп айтылат маалыматта.
