Бүгүн, 23-апрелде «АКИpress» редакциясына Свердлов РИИБдин башчысы Тилек Түкебаев борбор калаанын Келечек жаңы конушунда өлтүрүлгөн кыздын иши боюнча соттук-медициналык экспертизанын жыйынтыгы чыкканын билдирген.
Ал болгон окуянын айрым жагдайлары менен бөлүштү. 21-февралда Свердлов РИИБдин ыкчам кызматкерине Келечек конушунда кызды өлтүрүп, зордуктап кетишкени тууралуу маалымат түшкөн. Окуя болгон жерге барган милиция кызматкерлери үйдүн терезесинен бөлмөдө адам жатканын көрүшкөн.
Ичине киргенде кыздын сөөгүн көрүшкөн. Ал бычакталып каза болгон. Түкебаев белгилегендей, укук коргоо кызматкерлери эки шектүүнү жеринде кармашкан. Кыска убакыттын ичинде дагы төрт шектүү кармалган.
Свердлов РИИБдин башчысынын айтымында, экспертизанын жыйынтыгы маркум зордукталганын көрсөткөн. Ал кошумчалагандай, кылмыш иши Свердлов райондук сотуна жөнөтүлгөн.
Редакция өз булактарына таянып, окуя тууралуу айтып берди. Окуядагы жарандарын аттары өзгөртүлдү.
«Келечек конушундагы чакан үйдү Руслан менен Султан ижарага алышкан. Ошол күнү достору аларга конокко келип, мас абалында кече өткөрүшкөн. Руслан таанышы Гүлзаданы чакырууну чечкен. Эч нерседен кабары жок кыз Русланга келген, бирок үйдө алты жигит бар экенин көрүп, кеткиси келди. Бирок аны баары жакшы болот деп ишендирип, калууга көндүрүшкөн.
Мас абалында Руслан Гүлзаданы Султанга кызганып, кызга бычак менен кол салган. Бычакты анын көкүрөгүнө сайган. Гүлзада алган жараатынан улам ошол жерде каза болгон. Андан кийин төрт жигит качып, Руслан менен Султан кыздын сөөгү менен үйдө калышкан.
Руслан каза болгон Гүлзаданын денесиндеги канын аарчып, андан соң аны зордуктаган. Бул убакыт бою Султан уктап жаткан, кылмыш учурун көргөн эмес. Султан ойгонгондо Гүлзада Русландын жанында жатканын көрүп, жигит мындан пайдаланып калууну чечкен. Зордуктоо учурунда Султан Гүлзаданын өлгөнүн түшүнгөн»,- деп жазды редакция.
