Казакстандын Караганда облусунда өгөй ата 15 жаштагы кызды 38 жаштагы кишиге турмушка берген. Бул тууралуу Tengrinews.kz жазды.
Маалыматка караганда, «НеМолчи» фондуна кыздын агасы кайрылып, жардам сураган.
«15 жаштагы кызды өгөй атасы кыйнап турмушка берген. Кыз 5 күн зордукталгандан кийин качып чыгып, өз атасына барган. Алар ошол замат арыз менен полицияга кайрылган. Бирок арызды кабыл албай, убакытты создуктуруп жатат», — деп айтылат маалыматта.
Полиция маалымат берип, фонддун «полиция арызды кабыл албай жатат» дегенин четке каккан. «Арыз кечээ түшкөн. Кылмыш иши козголуп, кылмышка тиешеси бар жарандар суралып, керектүү экпертизалар дайындалды», — деп айтылат маалыматта.
Кийинчерээк кылмышка шектүү катары 38 жаштагы киши кармалып, камакка алынганын билдиришти. Кыз менен психологдор иштеп жатат.
